Eloff

Eloff is 'n Potch-student wie se platinum debuut-enkelsnit Johnnie Blou sy naam blitsvinnig gemaak het en sedert vrystelling op die trefferparades bly. Geheueverlies het dit na die nommer een-plek gevolg, en Witblits — sy nuutste snit, die storie van 'n windgat stadsjapie wat verbode liefde najaag teen oënskynlik onoortreflike struikelblokke, en aanvaarding vind op die laaste plek waar hy sou gaan soek, 'n plaaspartytjie — is sterk op pad na goud. Sy eie naam vir die klank is minimalistiese post-sokkie boeremusiek: tong-in-die-kies lirieke en ontploffende energie, en dis hoekom dit by elke goeie partytjie beland het.